應該係最後一次參與書展同大家見面。
十幾年嚟，我只有兩次同大家見面，一次係2013年，一次係2019年。
說實話，我鐘意兩年前嘅我，討厭兩年後嘅我。
最近預訂賣書事件，已經令好多人失望，我對自己更加失望。
我一直都想講賣書係無咩錢賺，我係想讀者有本書收藏，見自己仲有能力出就出比大家，所以幾多讀者訂書，我就印幾多本書。
但我最近先發覺，有班人喺訂書過程用唔同名同假資料陰啲陰啲咁訂大量書，然後唔比錢或上傳唔關事嘅垃圾圖當入數紙，最終我以為有好多人訂，所以印製咗好多書......
但原來係無咁多人買。
結果，明明本書應該賣清，但點解賣極都仲有，原來個原因就係咁。
結果，書賣唔哂，成本急劇上升，大量書一直放喺倉，錢就賠了。
我無怨其他人，怨就怨自己無仔細去睇清楚令到某班人可以成功玩弄我。
我已經好累，生活壓力同社會壓力真係令我感到疲倦。
都係時候抖一抖了，我希望嚟緊專注返Patreon，然後寫一本真係自己好鐘意嘅書比大家。
今日唔知聽日事，下年嘅香港變成點亦無人知，但依刻嘅我已經知道係最後一次了。
所以，如果大家都好奇想最後一次見下孔明，想買書支持下，都可以嚟書展探下我。
除咗書展最後一日我唔喺到外，其他日子我都喺到。(但唔好咁早，可能未瞓醒)
今次書展當係最後一次，所以將會拎哂所有書出嚟賣，希望大家未買嘅就盡快買，買咗嘅可以當禮物買比朋友睇。大家有$5000消費不妨用其中$100支持下我，如果唔係啲書又放倉了.....見到書咁樣我好心痛。
包括以下書籍：
1.《跟蹤》
2.《迷蹤》
3.《孔明故事集》
4.《失蹤》完整版
真心想講，《失蹤》真係好好好好抵買，係最值得買同睇嘅書。
入面包括完整版《失蹤》1、《失蹤》2、《失蹤》外傳.......
希望大家把握今次機會入手。
喺網上寫故仔寫咗十幾年，一直寫咗好多故仔陪伴大家成長。
眼前十幾年前嘅讀者已經變成媽媽，有埋仔女，我覺得成件事好正，好似壯舉咁，有一班讀者跟咗自己十幾年。
仲記得最深刻係兩年前喺書展去緊廁所，收到張晨打電話嚟：「成班黑衫人嚟咗擋口話要搵孔明。」
當時我嚇一嚇，心諗咩事，我係咪得罪咗人？
去到檔口，見到十幾個BlackBloc嘅後生仔，當佢地見到我就大叫：「孔明！終於見到你真人喇！」
原來成班手足岩岩遊完行，專程入嚟書展支持我。
我嗰刻真係感動到想喊，走前仲同大家講：「小心呀。」
成班手足笑住向我揮手道別。
手足，兩年後嘅你地，生活還好嗎？
***********************************************************************
書展日期：7月14 - 20日
攤位：1A-E10（洄水文化）
我同一班朋友開咗間洄水文化，多謝同伴一直打理同經營，辛苦你地了
愈嚟愈多追夢作家加入我地，希望大家能夠一直繼續落去。
https://www.facebook.com/%E6%B4%84%E6%B0%B4%E6%96%87%E5%8C%96-113237751025050/
另外
有關《孔明故事集》，我已經每日努力逐批逐批寄了
如果大家等唔到想嚟書展拎，隨時歡迎呀 =]
最後一句
書展見。
唉 打字打到想喊
書展嚟唔到又想買書，可以以下網址買
我嘅網店：https://homingming.boutir.com/
Search